🌷 श्री लक्ष्मीचा निवास...
कवयित्री : तिलोत्तमा विजय लेले

ऊँ श्रीं ह्रीं श्रीं कमले कमलालये प्रसीद प्रसीद ।।

सर्वांना सदाच हवा सरस्वती व लक्ष्मीचा निवास...
बाल्य जातं शिक्षणात, आयुष्य सरतं अर्थार्जनात...

ज्या घरी नांदते, विद्या-सुसंस्कार-माणुसकी-प्रेम,
खात्रीने तेथे टिकेल सुख-समाधान-स्वास्थ्य-क्षेम...

प्रत्येक घरात नक्की असतो श्री लक्ष्मीचा निवास...
तिचा कायमचाच असतो वावर, विविध स्वरुपात…

श्रीलक्ष्मीच वसते, वात्सल्य-मूर्ती-आईच्या रुपात...
कुटुंबियांना सावरणा-या, धर्म-पत्नीच्या स्वरुपात...

घराघरात गोड लाडक्या-प्रिय लेकीच्या स्वरुपात…
कधी खट्याळ-छोट्या, मोठ्या बहिणीच्या रुपात…

काही घरात, लाड-पुरवणा-या आज्जीच्या रुपात…
तर घरातल्या चिमुरड्या-गोड, नातीच्या स्वरुपात…

लक्ष्मीची ही सारी रूपं, जरी निरनिराळी असली...
तरीही श्री लक्ष्मीच वसत असते प्रत्येक रुपातही...

ज्या ज्या ठिकाणी, घरात स्त्रियांची होते जपवणूक
मानाची, आदराची, आपुलकीची प्रेमळ वागवणूक...

जेथे प्रेमाने, सन्मानाने जपली जाते स्त्रित्वाची बूज...
त्या सर्व-घरा-घरात, हमखास नांदते भरभरून सुख...

🌷@तिलोत्तमा विजय लेले
🙏🕉️🔆