🌷मेघ-दीप...
कवयित्री : तिलोत्तमा विजय लेले
आभाळामधे मेघ-दीप उजळावा
त्यावरती विद्युल्लतेचा तडकावा
मेघालयातून थेट मेघनाद व्हावा
त्यावरही जलधारांचा शिडकावा
सृष्टीच्या या नाद-मय स्वरूपाला
नितांत सुंदरशा निसर्ग सौंदर्याला
नव-चैतन्याच्या याच सोहळ्याला
शत-कोटी-नमन सृष्टी-देवतेला
कुठे निघाली ही नखरेल गवळण
रूम-झूम निनाद करीती ते पैंजण
धरणीवरती अलगद होतसे कंपन
श्रीकृष्ण-लीलांचे मोहक कोंदण
नादब्रह्माचे सुमधुर अद्भुत आवरण
स्वर्गात गंधर्व-किन्नर करीती गायन
त्याला साजेसे गोपाळाचे वेणुवादन
नवचैतन्याने पुलकित कण-न्-कण
🌷@तिलोत्तमा विजय लेले
🙏🕉️🔆
