कविता : 🌷 हळूच यावा पहाटवारा...
कवयित्री : तिलोत्तमा विजय लेले 

हळूच यावा पहाटवारा,
झिरमिर-झिरमिर पाऊसधारा 
अन् मंतरावा आसमंत सारा... 

हळूच यावा पहाटवारा,
झुळझुळणा-या निर्झरणीला
त्याचा किंचित वाटेल हेवा... 

हळूच यावा पहाटवारा,
आरस्पानी सूर मुरलीचा, 
अलगद अंतरी उमटावा...

हळूच यावा पहाटवारा,
सप्त-रंगांचा गगनाला, 
सुरेख मुलामा चढावा...

हळूच यावा पहाटवारा,
मावळतीच्या चंद्राला,
देण्या निरोप तो हळवा...

हळूच यावा पहाटवारा,
कोकिळकंठी संगीतात,
श्रुतीं-श्रुतींना बहर यावा...

हळूच यावा पहाटवारा,
त्या नादमधुर दुनियेचा
मना पुरता मोह पडावा...

🌷@तिलोत्तमा विजय लेले
🙏🕉️🔆