🌷 कटीबध्द...
कवयित्री : तिलोत्तमा विजय लेले

आपल्या भारतीय संस्कृतीमध्ये सणावारांची रेलचेल
पूर्वी घडलेल्या घटनांचे विस्मरण होऊ नये, हीच मेख

आपली परंपरा प्राचीन पण अत्यंत प्रगत अन् प्रगल्भ
त्यामुळेच समाज-प्रबोधन व पर्यायाने कल्याण सुलभ

प्रत्येक सण सुदृढ निरोगी समाजास योग्य दिशा-दर्शक
असे असूनही साजरा करण्याची पध्दत मात्र आकर्षक

नरक-चतुर्दशीच्या भल्या पहाटेला सचैल अभ्यंगस्नान
नरक निर्माण करणाऱ्या समाज-कंटकांना, कंठस्नान

काळ-बदलला युग-बदललं पण राक्षसी वृत्ती बेधडक
त्यांचा कर्दनकाळ होऊन, समूळच निप्पात आवश्यक

श्रीकृष्णाने नरकासुराचा-वध केला आजच्याच दिवशी
अन् सोळा-सहस्र बंदीवान स्त्रियांना प्रदान केली मुक्ती

या महान कर्तृत्वाची आठवण ठेवणे अतिशय जरूरी
कारिंट्यासम, समाज-कंटकाना रोखण्याची हवी कृती

अन्याय करणे गैर आणि तो सहन करणे त्याहूनही गैर
रोखठोक-कणखर भूमिका घेतली तर त्यांची नाही खैर

डोळसपणे विचार व अन्यायाचा प्रतिकार अत्यावश्यक
ख-या-अर्थाने हा सण साजरा करण्यास होऊ कटीबध्द

🌷@तिलोत्तमा विजय लेले
🙏🕉️🔆