🌷हां हां म्हणता आयुष्य साकारते...
कवयित्री : तिलोत्तमा विजय लेले

तसं पाहायला गेलो तर,
येणारा प्रत्येक दिवस तर,
चेहरा-विहीन नगण्य असतो...
एकाच्या सारखा दुसरा अन् तिसरा...

जणूकाही सर्व नवजात बालकं...
प्रथम दर्शनी सारखीच दिसतात
एक-सारखीच गुलबट, निद्रिस्त...
म्हणून गळ्यात आय् डी असतात...

जेव्हा मिटलेल्या पापण्या उघडतात,
स्पर्श, आवाज अन् दृश्य नोंदवतात...
जन्मदात्या आई-बाबांना ओळखतात...
खुद्कन हसून त्यांना कृतकृत्य करतात...

दिवस उगवता असंच होतं काहीसं...
निद्रिस्त, कोरा-करकरीत नवदिवस,
त्यावर जसे करू आपण संस्कार...
तसा-तसा होत जाईल तो साकार...

थेंब-थेंब जमवून तळे साध्य होते...
एक-एक दिवस, जोडता-जोडता...
कळत-नकळत सुरेख माळ बनते,
हां हां म्हणता, आयुष्य साकारते...

🌷@तिलोत्तमा विजय लेले
🙏🕉️🔆