🌷काळोखाने धूम ठोकली...
कवयित्री : तिलोत्तमा विजय लेले

वरुन खुणावते, गूढ हे आभाळ
खाली बघावे तर गंभीर पाताळ...

अधांतरी तरंगणारे विश्व मानवी
जळी-स्थळी-अन्-पाषाणी मायावी...

पैशांची ही किमया सारी नकली
भूल-भुलैया मायापुरी भूल घाली...

काळोखाने जे जाळे विणले रात्री...
आक्रसता नभ, झाली अंधेर-नगरी...

खोटीच सारी धांदल क्षितिजावरती...
बेगडी मानसिकता अन् दुनिया खोटी 

निशेचा टाहो ऐकून सूर्य डोंगरमाथी
डोकावून पाहता दिशादिशा लाजली...

पाखरांनी संगीतातून, दवंडी पिटली...
सम्राट येता काळोखाने धूम ठोकली...

🌷@तिलोत्तमा विजय लेले
🙏🕉️🔆