🌷आनंद ओसंडताना...
कवयित्री : तिलोत्तमा विजय लेले

अदमास कसा घ्यावा सुखाचा…
झिरमिर-झिरमिरत्या पावसाचा…

नक्षत्रांची कलाकुसर आकाशी…
हळुहळु उधळण होईल रंगांची…

भिरभिरते अलगद पिंपळ-पान…
तटस्थपणे झाडं करती कमान…

झुळझुळ वाहत्या वा-याचा दंगा…
हिमालयातून उगमली पवित्र गंगा…

पावसाची पीर-पीर झेलती झाडे…
डोंगर-माथी सूर्य, कलती कवाडे…

चंद्र उगवला, रात्रीचा प्रहर रंगला…
मेघावली चांदण्यांच्याच पंगतीला…

लांबवर झळके कळस राऊळाचा…
मधुर घंटा-नाद घुमतो गाभा-याचा…

आभाळ चंद्राळलेले ता-यांनी नटलेले…
आवार गंधाळलेले, रातराणी दरवळे…

तारूण्य स्वप्नाळलेले डोळे मिटलेले…
आनंद ओसंडताना चांदणे सांडलेले…

🌷@तिलोत्तमा विजय लेले
🙏🕉️🔆