🌷 मनाच्या सात-कप्प्यात...
कवयित्री : तिलोत्तमा विजय लेले

मनाच्या सात-कप्प्यात डोकावून पाहिलं…
अन् सातही दरवाजांना बंद करुन टाकलं...

पक्का बंदोबस्त म्हणून कुलूपसुध्दा लावलं…
तरी हळुच निसटून गेला गतस्मृतींचा सुगंध …

गत-स्मृतींना बंदी करणं, कितपत जमणार…
पारा पकडला तरी तो हातोहात सटकणार…

एकेका दरवाजाच्या आत कोंडला खजिना…
बालपणीचा, तरूणाईचा, कैक अनुभूतींचा…

लपूनछपून-चोरुन केलेल्या कित्येक गोष्टींचा…
त्यानंतर झालेल्या पहिल्या-वहिल्या प्रीतिचा,

कडू-गोड आंबट-खारट-सुखद आठवणींचा…
वर्षानुवर्षं बंदिवासात जखडलेल्या 'जीनी'चा…

बंधनात जखडलेल्या गढूळ मनाचा कोंडमारा…
ठासून-ठासून भरलेला त्यात कोपरा-न्-कोपरा…

दरवाजाची कडी-कोयंडा तोडून रेटा देणाऱ्या…
अन् आजवर दडवून ठेवलेल्या सा-या-सा-या…

आठवणीं फेर धरून खेळती, झिम्मा फुगड्या…
झुगारून देती मनावर लादलेल्या सुप्त मर्यादा…

कप्प्यामध्ये चोर-कप्पा, कसाही जपून ठेवला…
चोहीकडे दश-दिशांमध्ये गंध बनूनी दरवळला…

निमित्त मिळता अत्तराच्या कुपीतून सटकला…
जणू आकाशातील सप्त रंगांमधून झळकला…

मनाच्या अथांग अकल्पनीय दालनात आला…
सर्व बंधने झुगारून हृदयी विराजमान झाला…

🌷@तिलोत्तमा विजय लेले
🙏🕉️🔆