कवयित्री : तिलोत्तमा विजय लेले
तारिख : सोमवार, १९ जून २०२३
वेळ : ०८ वाजून ५४ मि.
असं का व्हावं, माणसं गेली की
त्यांची खरी ‘किंमत’ जाणवावी,
त्यांच्या ‘नसण्यानं’ बेचैनी व्हावी
विचारानं मनाची घालमेल व्हावी !
बेफिकीर वृत्तीनं वर्तमान वाहतो
जाताना सोबत सुखालाही न्हेतो
बंद डोळ्यांना जाणीवही नसते !
जेव्हा ती होते वेळ गेलेली असते !
कधी वाटतं ते मायाजाल असावं,
ज्यात भुरळ पडून भरकटत जावं
तन-मन गुरफटून भानही हरपावं !
जणू भूल पडून सर्वच धूसर व्हावं !
कैक जन्मांची पुण्याई कामी यावी
सुखाने पायांपाशी लोळण घ्यावी !
हुशार-प्रेमळ-पतीची साथ मिळावी
प्रेम-लाड-कौतुकाची बरसात व्हावी !
कुणा काळ्या-बेर्याची दृष्ट लागावी,
मोकाट जनावरा-सम वृत्ती पलटावी
सारासार-बुद्धी काम करेनाशी व्हावी,
चुकीच्या झापडांनी, मती गुंग व्हावी !
पश्चात्तापाने फार काही बदलत नाही
गेलेला सुवर्ण-काळ परत येत नाही !
झालेल्या चुकांची जाणीव जात नाही
बेगडी-मुखवटा फारकाळ टिकत नाही
@तिलोत्तमा विजय लेले
🙏🕉️🔆
