कवयित्री – तिलोत्तमा विजय लेले
तारिख – मंगळवार, २३ जानेवारी २०२४
वेळ – ४ वाजून २२ मि.
मुंगीताई मुंगीताई, लगबग कशापायी ?
सांगा ही, सदाचीच कसली इतकी घाई ?
वाघ पाठीशी जणू, लागल्या सारख्या …
का हो तुम्ही धावता, वेड्या-सारख्या ?
कडक शिस्तिचंही, तुम्ही पालन करता …
नीट रांगा करुन, मग धावतच राहता …
आकाराने तुम्ही ताई, इटुकल्या कित्ती …
रात्रंदिवसाची करता पण धावपळ अति …
कुणाचीच तुम्हांला वाटत नाही का भिती …
सततच्या चालतात हो तुमच्या करामती …
कधी-कधी कुणाशी, पंगाही तुम्ही घेता …
सुमडीत कुठे-कुठे, जाऊन तुम्ही डसता …
मुंगीताई तुम्ही जरी एवढ्याश्शा दिसता,
करु शकता हत्ती-दादालाही, वेडापिसा …!
थकणं तर तुमच्या, स्वभावातच नाही …
येते कुठून ही ऊर्जा, सांगा आम्हालाही …
🌷@तिलोत्तमा विजय लेले
🙏🕉️🔆
