कविता :🌷 घन-व्याकूळ संध्या-समयी...
कवयित्री : तिलोत्तमा विजय लेले
तारिख : १० एप्रिल २०२६
वेळ : सकाळी, ८ वाजून ३१ मि.

घन-व्याकूळ संध्याकाळी
का जीव उगा हुरहुरतो…
अन् भावना अनावर होता,
सुगंध फुलांचा दरवळतो…

या व्याकूळ संध्या-समयी 
शब्द-घनही वितळत जातो…
शब्दांच्या जलधारा नयनी,
अन् नभीचा चंद्र ठाव घेतो...

या घन-व्याकूळ संध्याकाळी
सौख्याचा पाऊस पडतो…
अन् निशेची चाहूल होता…
लगबगीने सूर्य मावळतो…

घन-व्याकूळ संध्या-समयी
क्षितीजाचा थांगही नसतो…
झुडुपांच्या सळसळीमध्ये,
अन् साक्षीला चंद्रही नसतो…

घन-व्याकूळ संध्याकाळी
स्वप्नांचा पाऊस पडतो…
अन् झरझरणारा निर्झर,
अखंड भिजवत राहतो…

🌷@तिलोत्तमा विजय लेले
🙏🕉️🔆