कविता : 🌷 "अथ पासून इति पर्यंत"
कवयित्री : तिलोत्तमा विजय लेले

कधी कधी प्रकर्षाने असे वाटते...
आयुष्य पुन्हा एकदा सुरू करावे
अगदी अथ पासून इति पर्यंतचे 
पुन्हा पुन्हा तेच तपासून पहावे
निरामय जीवन पुनः-पुन्हा जगावे ||

चूल, बोळकी अन् भातुकली
लहानपणीचे सारे सखे-सोबती
अगदी बालपणीचे जे जे काही
आठवते तिथवर थेट पोहोचावे...
आयुष्य पुन्हा एकदा सुरू करावे ||

इवलेसे हात अन् इवलेसे पाय
इटुकले मन अन् पिटुकले जग
त्या निखळ आनंदाला का मुकावे ?
ते अनमोल क्षण पुन्हा मनीं वेचावे...
निरामय जीवन पुनः पुन्हा जगावे
आयुष्य पुन्हा एकदा सुरू करावे ||

कष्ट करावे, पोटापुरते कमवावे
कुणाच्या पुढे हात न पसरावे,
निरपेक्ष भावनेने जीवन जगावे
सुख भरभरून द्यावे अन् घ्यावे...
निरामय जीवन पुनः पुन्हा जगावे
आयुष्य पुन्हा एकदा सुरू करावे ||

जे मनाने अथवा शरिराने पांगळे
अनाथ-आबाल-वृध्दत्वाने ग्रासलेले
सढळ-हस्ते धनदान-श्रमदान करावे
प्राणिमात्र-निसर्ग यात देवत्व पाहावे...
निरामय जीवन पुनः पुन्हा जगावे
आयुष्य पुन्हा एकदा सुरू करावे ||

🌷@तिलोत्तमा विजय लेले
🙏🕉️🔆