कविता – 🌷 ” संत-महंतांची पारख “
कवयित्री – तिलोत्तमा विजय लेले
तारिख – ६ डिसेंबर २०१६
रसाळ ओघवती असे वाणी …
भक्ति- रसाने परीपूर्ण गाणी …
ओळखावा संत, तोची जनीं …
त्याच्या, भाळी टिळा नसूनही …!
सच्चा अनुभवी सज्जन …
भावनापूर्ण त्याचं कथन …
करीतसे सर्वां, मार्गदर्शन …
ओळखू येई तो, गुरू-जन …
त्यां, पायी खडावा नसूनही …!
पर-स्त्रीचा करूनी पूर्ण सन्मान …
तिज देई आई- बहिणीचा मान …
न पाही डोळा, वर करून मान …
ओळखावा, शिवछत्रपती महान …
कमरेस भवानी-तलवार नसूनही …!
अंतर्यामी संतुष्ट, सरळमार्गी, एकनिष्ठ …
पर-धन पाहुनी, जरा न होतसे आकृष्ट …
डोळे मिटून घेतसे, तंद्री लागे ध्यानस्थ …
पै-पैका, सोनं-नाणं ज्यास वाटे नि:कृष्ट …
साधू तोची ओळखावा, माथी जटा नसूनही !
निंदा-नालस्तीचा उलटाच होई प्रभाव …
आनंदे नाचे, जणू स्तुतीचा झाला वर्षाव …
अशी वल्ली ओळखावी, संत-पदा भूषवीं …
जरी नसे टाळ हाती, गळा माळ नसूनही …!
🌷@तिलोत्तमा विजय लेले
🙏🕉️🔆
Leave a Reply