🌷भन्नाट विचारांच्या भव-यात...
कवयित्री : तिलोत्तमा विजय लेले

भन्नाट विचारांच्या भव-यात...
ना अडकला जीव कोड्यात…

अखंड ओढ असते पाण्यात,
म्हणूनच जीव नाही भांड्यात… 

अचूक गणित मांडू आयुष्यात, 
ठोकताळे ते मनातल्या-मनांत…

पण आडाख्यांच्या चक्रव्यूहात, 
जरी सर्वस्व पणाला वास्तव्यात…

शुभ-अशुभाच्या त्या जबड्यात, 
नियतीच्या अगम्यशा खेळण्यात…

मूक आक्रोशाच्या त्या आवेगात, 
अन् प्राक्तनाच्या गूढ न्यायालयात…

कैक दोषारोपांच्या मूढ बदल्यात, 
त्याच दृश्यादृश्य शिक्षा भोगण्यात…

चूक की बरोबर हेच पारखण्यात, 
दिवसामागून दिवस घालवण्यात…

सांभाळुन आयुष्याच्या मोजमापात,
काय मिळवले-गमावले या जगतात…

सरतच चालले दिवस तपासण्यात,  
थकलेल्या तनमन-देहाच्या पदरात… 

अगणित अतृप्त मागण्यांची ही हाव,
चटक्यामागून चटके मूक-बहिरे-घाव…

अथक अनंत अंतरीचे साद-पडसाद... 
योग्य दिशा-दर्शन पावले टाकण्यास… 

सुख-दु:खाच्या भरजरी वस्त्रा-वरती,
तव-कृपेचा वरद-हस्त असो मस्तकी…

🌷@तिलोत्तमा विजय लेले
🙏🕉️🔆