🌷 भरतंच नाही, मन काही...
कवयित्री : तिलोत्तमा विजय लेले

जे आहे सूक्ष्माहून सूक्ष्म, विराटाहून विराट… 
मानवी-मन आहे समस्त विश्वाहूनही भन्नाट… 

अफाट, अथांग महासागराहून अतिविशाल…
वेळोवेळी होई प्रचंड हिमालया-समान ढाल… 

क्षणांत इकडे, क्षणात तिकडे अशी चंचलता… 
योगाभ्यासाने आत्मसात होईल एक-स्थिरता… 

भ्रमरा समान भिरभिरत बसते फुला फुलांवर… 
पण कधी ठाव न लागे मनाचा खोल खोलवर… 

मन आहे असा गंध कधी संपता संपत नाही… 
मन असा वारा जो झुळझुळणे थांबवत नाही… 

कितीही नद्या, महानद्या येऊन मिळाल्या तरी,
मन आहे असा सागर जो भरता भरतच नाही… 

सुख असो, दु:ख असो घळघळणं थांबत नाही… 
मन आहे असा पाऊस जो सरता सरतच नाही… 

मन असं लोचट किती हाकलले हलतही नाही… 
मन असं लोभी, की लोभ संपता संपतच नाही… 

मन असा पारा, जो मुठीत धरणं शक्यच नाही… 
मन असं दर्पण, जे प्रतिबिंबित होऊ देत नाही… 

मन असं निर्लेप, कशातही ते अडकतच नाही…
मनाच्या गुण-दोषांचं मोजमापन शक्यच नाही… 

जणू ब्रह्मांडा एवढी प्रचंड, असे मनाची व्याप्ती…  
अंतरेच्या अंतरे लिहूनही, भरतंच नाही, मन काही...
 
🌷@तिलोत्तमा विजय लेले
🙏🕉️🔆