🌷 पूर्ती, अतृप्त-इच्छांची... 
कवयित्री : तिलोत्तमा विजय लेले

सिंहासनगता नित्यं पद्माश्रितकरद्वया ।
शुभदास्तु सदा देवी स्कंदमाता यशस्विनी ।।

दैत्य-अत्याचारांनी प्रजा फार त्रासून गेली होती,
तारकासुरानें, त्रिलोकात त्राही माजविली होती…
देव-दानव संग्रामात, स्कंद-बाळ होता सेनापती…
स्कंदमातारुपात स्कंदासह देवीची रणी नियुक्ति...

स्कंदबाळ मांडीवर, माता सिंहावर आरूढ झाली…
चार भुजा-त्रिनेत्र-सोन्यापरी तेजाने झळके कांती…
देवी-स्कंद-माता ही हिमालयाची ओजस्वी-सुपुत्री,
स्कंदमाता, शूरवीर-स्कंद-बाळ, रणी लढले सर्वस्वी...

सेनापती-स्कंदाच्या शौर्यामुळे, सर्व स्तंभित होती…
अथी-रथी-महारथी सगळेच, तोंडात बोटे घालती…
मुरुगन-स्कंदाने, लीलया वध केला तारकासुराचा…
मातेसह-स्कंदाने पराजित केले पूर्ण दानवसेनेला...

पूर्ण नाश केला घोर-अन्यायी, दुष्ट-पापी-दानवांचा…
देवादिकांनी जयजयकार केला विजयी, स्कंदाचा…
स्कंद-माता धन्य झाली निज-पुत्राचे कौतुक होता…
तिनही-लोक निश्चिन्त झाले, तारकासूर-वध होता...

स्कंदमातेच्या आशिर्वादे, जणू मोक्षाचे द्वार उघडे
प्रचंड-दैवीशक्तिच, भक्तांचा संपूर्ण योग-क्षेम वाहे
उपासकांच्या सर्व अतृप्त इच्छांची पूर्ण-पूर्ती होते
परमानंदाची मानसिक-स्थिती कायम टिकून राहते...

🌷@तिलोत्तमा विजय लेले
🙏🕉🔆