🌷 क्षण-क्षण फुलले रे...
कवयित्री : तिलोत्तमा विजय लेले

लुक-लुकणारे सांज-तारे अंबरात अवतरले… 
पान-जाळीतून चांदणे बावरले झिरपत गेले…

करवंदाच्या जाळ्यात अडकले, मन वेडावले…
कैरी-चिंचा बोरं-आवळे-हातही जांभळे झाले… 

पाण्यावरील तरंग, होडी तरंगत घेत हेलकावे… 
गगनात अलगद झोपाळ्याने उंच उंच झुलावे…

पावसा परीस सुख, बरसावे रिमझिम-रिमझिम…
अन् त्या जलधारात तनमन, भिजावे चिंब-चिंब…  

आकाशी गोड गिरकी घेऊन थेंब-थेंब थरथरले… 
सुखद सुंदर झुळुक येऊन पायीचे पैंजण ओले… 

सप्त रंग उधळीत-उधळीत इंद्रधनुष्य ते खुलले… 
क्षण-क्षण फुलले रे शुभ-शकुन अंतरी जे जपले…

🌷@तिलोत्तमा विजय लेले
🙏🕉️🔆