🌷सफल झाली वारी...
कवयित्री : तिलोत्तमा विजय लेले

आपले जीवन ही सुद्धा आहे एक वारी…
कैवल्याच्या चांदण्याची ही किमया सारी…

जावयाचे आहे हो आयुष्याच्या पैलतीरी…
एकच ध्यास एकच आस जीवाची पंढरी…

युगानुयुगे पुंडलिकासाठीच उभा विटेवरी…
साठवू विठ्ठल-रखूमाई हृदयाच्या गाभारी…

रूप पाहता लोचनी श्रीहरी भक्तांते उद्धारी…
कोणी नसे थोर वा नसे सान चंद्रभागे-तीरी…

तारावया सर्वां तुकोबांची गाथा अन् ज्ञानेश्वरी… 
नामघोष करत-करत, मोक्षप्राप्ती करी वैखरी…

ख-याखु-या भक्तीचीच, खरीखुरी मातब्बरी…
दोन हस्त अन् लीन मस्तक, ईश्वराच्या पायी...

जो मानस-पूजा करी, निष्ठेने कर्तव्य पार करी…
त्या प्रत्येक निष्ठावंताची, सफल झालीच वारी...

🌷@तिलोत्तमा विजय लेले
🙏🕉️🔆