🌷 स्वप्नामधली कल्पना…
कवयित्री : तिलोत्तमा विजय लेले

डोळ्यांत तरळते अलवार सूक्ष्म अशी भावना
कावरी-बावरी होऊन जाते तिज न्याहाळताना

बहाणे कितीही केले तरी ती हळुच डोकावते
नजरेला नजर भिडतांच लाजून चूर-चूर होते

मी तळहात पुढे करता ती कवडसा बनून येते
डोळ्यात डोळे घालून जणू ती मजकडे पाहते

फुलबागेत जाता दरवळणारे-फूल-सुगंधी होते
हलकीशी झुळुक होऊन गालांना स्पर्शून जाते

श्रावण-सरींचे सुरेल संगीत अलगद कानी पडते
सोनेरी उन्हात न्हाऊन धरणी ताजीतवानी होते

सणा-सुदीला आनंद असा दुथडी भरून वाहतां
ऊन्हा-पावसाचा पाठशिवणीचा खेळ रंगात येता

नजरेतूनच गुपचुप-गुपचूप गस्त घालता-घालता
तरूणाईचे रम्य दिवस फिरफिरून जगत असतां

स्वप्नामधली कल्पना समोर प्रत्यक्ष उभी ठाकता
उमजत नाही मनाला क्षणभर काय करावे आता

🌷@तिलोत्तमा विजय लेले
🙏🕉️🔆