🌷 मना-मनात कोरलेले… 
कवयित्री : तिलोत्तमा विजय लेले

वितळलेल्या चंद्राचे मृदुभाव निथळले…
क्षितीजावरती गगन धरणीला बिलगले…

नक्षत्रांचा कलाकार आकाशीचा चांदवा… 
दूरच दूर दरी-दरीतून कानी पडतो पावा…

डोळ्यांच्या झरोक्यातच चित्र उमटतात…
नयनातून सुप्त झरे झुळझुळत वाहतात…

त्या चाहुलीने मनात प्रीत-लहर बहरली… 
दबक्या पावलांनी गाली पसरली लाली…

कळत-नकळतच झाली रोमांचित काया…
रोमरोमी झळकते प्रीतीची मोहक छाया…

स्वप्नातील 'त्याच्या'नजरेस नजर भिडली…
अन् नखशिखांत सुमधुर संवेदना उमटली…

दिशा-दिशांच्या गाली सांजरंगांची लाली… 
अन् प्रतिबिंबातील स्मिताने बाजी मारली…

एका क्षणार्धात जुळलेले ते सूर गीत बनले… 
जे बंधनात जीव सुखावले ते समरस झाले… 

चंद्राशी मधाळ गुंजन करून चांदणे सांडले…
तरूणाईचे हे स्वप्नरंजन मना-मनात कोरलेले… 

🌷@तिलोत्तमा विजय लेले
🙏🕉️🔆