🌷 इच्छित फल-प्राप्ती... 
कवयित्री : तिलोत्तमा विजय लेले

थोर ऋषी " कात्य " यांनी घोर तप केले,
दुर्गा-मातेला "पुत्री-रुपात," मागुन घेतले…
वरदान म्हणून जन्म घेतला प्रसन्न देवीने,
कात्याऋषींनी "कात्यायनी" हे नाव दिले…

आजच्या नवरात्रीच्या सहाव्या शुभदिनी,
पूजन-अर्चनाची उत्सव-मूर्ती, कात्यायनी...
शांत-रूप, चार भुजा, त्रिनेत्रा, वरदायिनी...
शोभिवंत-सोनपरी-कांती-सुंदर त्रिभुवनी...

महिषासुर राक्षसाचे अतोनात अत्याचार...
तिन्ही लोकी माजलेला नुस्ता हां-हांकार...
विजयादशमीचा अतिशय शुभ होता वार...
क्रूर-मुजोर दैत्यास देवीने जीवे मारले ठार...

ही देवी मनो-सामर्थ्य, मनो-धैर्य वाढविते…
त्यामुळेच "मन-शक्ति"असेही नाव पडले...
रुक्मिणीने कात्यायनीलाच होते पुजिले,
देवी-कृपा-प्रसादे तिला श्रीकृष्ण मिळाले...

मनोभावे जो कात्यायनी-मातेला पूजेल,
त्यास धर्म-अर्थ-काम-मोक्ष सर्वच लाभेल...
कात्यायनी सत्य-धर्म-न्याय-निष्ठा पाळते,
भक्तांच्या वांच्छित मनोरथांची पूर्ती करते...

रोग-शोक-संताप-सूड-भयापासूनी मुक्ति...
भूलोकी अदभूत सुदैवाची होऊन प्राप्ती, 
लाभती सगळी सुखे, नाम-कीर्ती-श्रीमंती... 
साधना केल्याने होते इच्छित फल-प्राप्ती...

🌷@तिलोत्तमा विजय लेले
🙏🕉️🔆