🌷माणुसकी आहे जिवंत...
कवयित्री : तिलोत्तमा विजय लेले

खेडेगावच्या जीवनाची गंमतच न्यारी…
नभ धरणीला भिडते दूर क्षितीजावरी…

आनंदाची लयलूट, रमणीय निसर्ग भारी…
सूर्य-किरणांचा सुरू लपंडाव, डोंगरावरी…

किरणा-किरणांनी सजते ही धरा मल्मली…
हरित तृषा पानापानात दव-बिंदूंनी नटली…

डेरेदार वृक्षांच्याखाली शुद्ध शितल छाया…
पांथस्थांच्या सावल्या निवांत विसावल्या…

सूर-पारंब्या खेळण्यातच पोरं होतात दंग…
जगबुडी झाली तरी समाधीत नाहीच भंग…

ग्राम-पंचायत भरण्यासाठी एकच ठिकाण…
वडा-पिंपळाच्या पारावरच मांडणार ठाण…

वडीलकीच्या नात्याने सांगून चार गोष्टी…
तंटे-बखेडे संपून कुणी-नाही दु:खी-कष्टी…

शहरी वातावरणात कोणी नसे कोणाचा…
गावातील घरा-घरात सर्वांमध्येच घरोबा…

एक हाक मारता अख्खं गाव होतं गोळा…
माणुसकी आहे जिवंत म्हणून वाटे लळा…

🌷@तिलोत्तमा विजय लेले
🙏🕉️🔆