कविता : 🌷 " मधुर शिरशिरी जरा-जरा "
कवयित्री : तिलोत्तमा विजय लेले

उधळले नवरंग गगनी, अवघी अद्वैताची करणी
हिमगिरीची उत्तुंग उभारी, गरूडाची उंच भरारी

येता आभाळ दाटून घननीळ मेघांची दाटी झाली
सरींवर सरींच्या चढाओढीतच दामिनी चमचमली

मावळतीला सूर्य झुकता महासागरा भरती आली
दाणा-पाणी-चारा घेता-घेता, पक्ष्यांची घाई उडाली

घुंगरांच्या तालावर आतूर गाई-गुरे वासरांच्या भेटी
मंजुळ पावा सुरेल तान रासात-मग्न गोपी-जगजेठी

नभीचे सतरंग उधळता सप्तसुरांची-मैफल रंगली
कैफ चढला नव-चैतन्याचा नवी-दिशाही उजळली

आला असा दुडूदुडू-धांवत रम्य शितल पहाट-वारा
अलगद स्पर्शून गालांना, मधुर शिरशिरी जरा-जरा

🌷@तिलोत्तमा विजय लेले
🙏🕉️🔆