🌷 शुभंकरी-देवी-कालरात्री...
कवयित्री : तिलोत्तमा विजय लेले

रात्रीच्या क्लेशांचा निचरा होऊन सोनेरी ही सकाळ…
जी "कालरात्री" देवीस प्रेम-पूर्वक समर्पित सर्वकाळ…

दुर्गामातेचा असे हा सातवा अवतार, आदि-पराशक्ति...
गळ्यात मुंडमाळा, महा-भयंकर रुद्रावतार धारिते ती…

दुर्गेचं हे सातवं रूप, उंच-निंच-महा-काय-अतिभव्य...
काळा-कभिन्न वर्ण परि ती अत्यंत ज्योतीर्मय-दिव्य…

दुष्टांचे परिपत्य हे एकमेव लक्ष्य जणूकाही एकलव्य
वध करी खलांचा-खलवृत्तींचा, चोख बजावी कर्तव्य...

देवी "कालरात्री" चतुर्भुजा देवी, रात्री होते ती सक्रिय...
निप्पात करून टाकते क्रूर-दैत्यांचा जे असती निर्दय...

गर्दभ तिचे वाहन असे जे तिज आहे अत्यंतिक प्रिय...
पति-परमेश्वर शिवशंकर-महादेव हेच तिचे प्राण-प्रिय...

देवी-पूजनाने सरून जातील सर्वच प्रकारच्या बाधा...
नकारात्मक व्यक्तिसुध्दा होईल अत्यंत सरळ-साधा...

"शुभंकरी" हे नाव पडले देवीचे कारण ती स्वयंसिद्धा...
संपूर्ण रक्त प्राषून वध केला तिने, हरविले "रक्तबीजा"

"काल" म्हणजेच शिव, त्याचीच पत्नी म्हणून "काली"
महाकाली, चामुंडा, चंडी, भैरवी उग्ररूप विनाशकारी…

"काली," सर्व असुरांचा कर्दनकाळ, म्हणूनी कालरात्री…
काळ म्हणजे मृत्यू, अज्ञानाचा अंधकार नष्ट करणारी...

देवलोकी मुजोर दानवांस केले अर्धमेले टाकून फुत्कार...
यमसदनास पाठविले रौद्रीने, प्रत्येकाला करूनी बेजार...

पूजा-अर्चा-समय रात्री, साधकाचे ध्यान सहस्रार चक्री...
करीते भक्तांना निर्भय देऊन सिद्धी, भीतीपासून मुक्ति...

भक्तांच्या चिंतांचे हरण, अज्ञानाचा संपूर्ण विनाश करते...
उजळून जीवन, संकटांचा सामना करण्यासही शिकविते...

🌷@तिलोत्तमा विजय लेले
🙏🕉️🔆