🌷 विश्व-निर्माती-कुष्मांडा देवी...
कवयित्री : तिलोत्तमा विजय लेले

ऐं ह्रीं क्लीं कूष्मांडायै नमः
सुरासम्पूर्णकलशं रुधिराप्लुतमेव च।
दधाना हस्तपद्माभ्यां कुष्माण्डा शुभदास्तु मे॥

दुर्गा-देवी जेव्हा संपूर्णतः झाली तेजांकीत,
तिच्या सुहास्य-वदनाने, विश्व झाले निर्मित…
त्याआधी संपूर्ण-जग बुडलेलं घोर अंधारात…
म्हणून कुष्मांडा देवी-विश्वनिर्माती-म्हणतात…

आदि-शक्तिच्या अद्वितीय, प्रखर तेजामुळं,
दुष्टांचा अंत, नष्ट होतात, पापांची पाळंमुळं…
बाधांचा-कष्टांचा-अंत नष्ट-सर्व क्लेश समूळं… 
भक्तांचे संरक्षण, संकटे दूर पळतील सकंळं…

देवीची सुवर्ण-कांती तेजामुळे झळाळणारी… 
सुहास्य वदनाने बिजली-समान तळपणारी… 
देवीची आभा सूर्यासमान प्रकाश फेकणारी… 
अंडाकृती ब्रह्मांडाची तीच निर्मिती करणारी…

म्हणूनच देवीचे नाव पडले, " कुष्मांडा देवी "…
आठांपैकी पाच, अस्त्र-शस्त्र घेऊनिया हाती… 
अष्टौसिद्धी-दाती जपमाळ, असे एका हाती…
कमंडलू अन् कमलपुष्प धरिले एकेका हाती…

भक्तिपूर्ण-भावे, देवीची करता पूजा-आरती…
लाभेल दिर्घायु प्रकृती-स्वास्थ्य, नाम-कीर्ती…
ज्ञानोदय, शक्ति-सद्-बुद्धि-अज्ञानाची क्षिती…
म्हणून योगीजन कुष्मांडा-स्वरूपास पूजती…

देवीच्या कृपेने मनामधले मळभ नाहीसे होते…
अंतर्मन-प्रकाशमान होते निराशा पळून जाते…
सूक्ष्म-ब्रह्मान्डी अंतर्बाह्य समतोल शक्य होते… 
माणसाला जन्म-मृत्यूच्या फेऱ्यातून सोडविते… 

🌷@तिलोत्तमा विजय लेले
🙏🕉️🔆