🌷 देवी ब्रह्मचारिणी...
कवयित्री : तिलोत्तमा विजय लेले

दुसऱ्या जन्मामध्ये देवी जगन्माता,
वर्षानुवर्षांपासून घोर तपस्या करता
त्याचे तिन्ही-लोकी कुतुहुल पसरता...
नक्की कोण बरं आहे, ही तपस्विता...

पहिल्या वर्षी फक्त फलाहार ग्रहण...
दुसऱ्या वर्षी नुसती बिल्व-वृक्ष-पर्ण...
तदनंतरची कित्येक वर्षे शुष्क-पर्ण...
मग तिने अजून तीव्रतेने केला "पण"...

"जोवर स्वतः शिवशंकर न देती दर्शन,
वर्ज्य सर्वच, फळं-पर्ण-पाणी वा अन्न " 
देवाधिदेव-महादेव स्वतः समाधित मग्न...
तिन्ही लोक भयभीत, त्यात येईल विघ्नं...

शिव-शंभों जर कोपले, तर काय होईल...
या नुसत्या विचाराने धरा थरथर कापेल...
सर्व देव, दानव घाबरून पळत सुटतील... 
त्रिनेत्राने डोळे उघडता भस्मिभूत होतील...

ब्रह्मतपामध्ये लीन होती त्रिभुवन-सुंदरी,
त्रिकाल-ज्ञानी, धरोनी रुद्राक्ष-माळ करी...
कमंडलू धारण केले देवीने दुसऱ्या करी...
श्वेत-वस्त्र-परिधानित, ही आहे माहेश्वरी...

गौर-वर्णावरती शोभती शुभ्रधवल-वस्त्रं...
शांती-दायिनी देवीचे तपश्चर्या हेच अस्त्रं...
तप-साधनेत संपूर्णत: रत, न हाती शस्त्रं...
ज्योतीर्मय अंतस्थ-तेज-पसरले चतुरस्त्रं...

शोभे पुष्प-अलंकारांनी-देवी ब्रह्मचारिणी...
श्वेतांबरा-देवीला “अपर्णा” म्हणती कुणी...
जे-भक्त-मनोभावे-पूजती, देवी-देई-तृप्ती... 
तिच्या दिव्य-दर्शने लाभेल-अंतस्थ-शांती...

🌷@तिलोत्तमा विजय लेले
🙏🕉️🔆