कविता - 🌷' जणू जग जिंकले '
कवयित्री - तिलोत्तमा विजय लेले

खरोखर सुदैवाचा-भाग्याचा-प्रयत्नांचा, 
हा ठेवा, जणू खणखणीत बंदा रूपया

ही भाग्य-संपदा नशीबी नाही ज्यांच्या
त्या सर्वां वाटे भाग्यशालींचा फार हेवा

प्रत्यक्षात झीज ही सतत होतंच राहते 
म्हणून वयापरत्वे शरिर-व-मन थकते 

सदैव मेंदूचे, शरीराचे, मनाचे सगळे 
विभाग स्वास्थ्यपूर्ण कार्यक्षम असणे 

वय वाढूनही विस्मृतीचा त्रास न होणे
ही अजिबात लहान-सहान गोष्ट नव्हे 

सर्व गोष्टी लक्षपूर्वक करणे शक्य होणे
दृष्टी-श्रवण शारिरीक क्षमताही जपणे

थोडक्यात नाकावर चष्मा, कानात यंत्र 
लावून फिरण्याची  गरजच न भासणे 

व्यवस्थित चावायला-शोभेला-हसायला
दंतपंक्तींची उपस्थिती असणे महत्त्वाचे

गति मंद असूनही सदैव कार्यक्षम असणे 
तारुण्यातील दुर्लक्षिलेला छंद जोपासणे

माणसं जमवणे अन् माणुसकीला जपणे
ज्यांस जमले त्यांनी अक्षरशः जग जिंकले 

🌷@तिलोत्तमा विजय लेले