कविता - 🌷 " तारी राम-नाम-स्मरण " 
कवयित्री - तिलोत्तमा विजय लेले 
तारिख -  १७ एप्रिल २०२४



नुसतं राम-राम म्हटल्याने पापांचे डोंगर नष्ट होती 
ही थेट वाल्या कोळी पासूनच येते सर्वांना प्रचिती 

पाप केलं मनानं, शरीरानं, हातांनी वा विचारांनी 
कसंही केलं तरी ते जमा होतंच जातं, अंतर्यामी 

वाल्या-कोळ्यानी केली पापं, पोटा-पाण्यासाठी 
माणूस करतो, कुटुंबासाठी-प्रेमापोटी-मजेसाठी 

पापांची वारूळंच्या-वारूळं उभी करतो, अंतरी 
जेव्हा जागृक होतो, चिडतो-पस्तावतो स्वतःवरी 

आयुष्यात जेव्हा-केव्हा त्याचे अंत:चक्षू उघडतात
सपशेल उपरती होऊन, तीच होते नव्याने सुरवात

अगदी प्रथम तर कोणीही " राम राम" म्हणायला,
मनं-बुद्धी आणि जीभही तयार नसतेच वळायला 

"राम-नाम"घेऊन वाल्याकोळी प्रमाणे नाम-जपलं 
तर सन्मार्गावरचं पहिलं-वहिलं पाऊल होऊ शकतं 

अर्थात कधीही "वाम-मार्ग" सोडणं, सोपं नसतंच 
अट्टाहासाने ठरवलं,"मरा-मरा" विपरीत म्हणायचं 

मग हळूहळू सुरु होतं, पापांच्या राशींचं वितळंणं,
तळमळ पारखून विधाता करतो पुढील मार्ग-दर्शन 

अंतर्स्थित गुरु करतो "प्रत्येक-वाल्याचं" रूपांतरण, 
चिकाटीने, अथक प्रयत्नांती तारी राम-नाम-स्मरण

🌷@तिलोत्तमा विजय लेले🙏🕉️🔆