कविता : 🌷 " अंती उरे फक्त दुनियादारी " 
कवयित्री : तिलोत्तमा विजय लेले

झाली रात वैरीण, अंधार दाटला दाटला...
अवघा काळोख जणू कृष्ण-सखा झाला...

जाईजुई साद घाली सुगंधित वारा झाला
अशी निरव शांतता, कोण सावरे मनाला...

स्वप्नील रंगछटांनी, चितारल्या सांज-वेळा
येता श्याम समीप, मनी झंकारल्या तारा...

फुलवूनिया पिसारा, मन-मयूर धुंद झाला...
चकोर मातला-मातला, शुक्रतारा मंदावला...

वारा पेटला ईरेला, लाटांनी हैदोस घातला
तुफान उसळे सागरी, फेस तोंडाला आला...

खाता-खाता हेलकावे, नाव झाली सैरावैरा
शीड फडफड करी, राहीला दूरवरी किनारा...

मनोमन धावा चाले, वेडेपीसे सारे खलाशी
हातात-हात चांदण्यात, शल्य खुपते ऊराशी...

सुखातच वाटेकरी, दु:खामध्ये नसे भागीदारी
औट-घटकेचे सारे, अंती उरे फक्त दुनियादारी…

🌷@तिलोत्तमा विजय लेले
🙏🕉️🔆