🌷 संस्कृतीची बूज राखूया...
कवयित्री : तिलोत्तमा विजय लेले

पत्र बंद असो वा असो उघडे,
मन मात्र, कधी नसावे कोरडे...
आपल्या मनामधील ओलावा,
हाच तर आहे खरोखरचा दुवा...

"जुने-जुने" असले जरी सोने,
नव्या तंत्रात नाही काहीच उणे...
आपले मन, असेल जर निर्मळ
उमलेल चिखलामधूनी कमळ...

संवाद-माध्यम कोणतेही असेल
पोस्ट-कार्ड असो अथवा ई-मेल..!
संदेशच महत्त्वाचा आहे त्यातला
दोन व्यक्तींच्या-मधील जिव्हाळा...

एक नया पैशाचाही खर्च नाही
अन् पोस्टमनचीही गरज नाही...
संदेश पोहोचतो चुटकी-सरशी
केव्हाही पाठवावा, बंधन नाही...

जुन्या-मधील चांगले घेऊनिया,
नव-तंत्राची त्यास जोड देऊया...
अधिकाधिक प्रगती करूनिया,
महान संस्कृतीची बूज राखूया...

🌷@तिलोत्तमा विजय लेले
🙏🕉️🔆