🌷 सळसळता ज्वालामुखी...
कवयित्री : तिलोत्तमा विजय लेले

आभाळाला सुध्दा भिंती घालणाऱ्या नानांची… 
जिद्द मात्र होती एक चिरंतन ध्येय जगण्याची…

त्यांनी केली भलावण वास्तवपूर्ण आयुष्याची…  
चार चांदण्यांची, साधीशी चौकट जगण्याची…
 
महान कलासक्त, दिग्गज कलाकार ही ख्याती… 
बक्षिसं, मानचिन्हं, यश-चिन्हं, पुरस्कार-प्राप्ती…

आत्मशोधक रोख-ठोक, अशीच जीवन-शैली…
नानांची उत्कृष्ट अभिनय-कला,  प्रभावशाली…

ती अभिजात अभिनय कला, मनं जिंकणारी… 
शब्दफेक सहजपणाने काळजाला भिडणारी…

अत्युच्च पातळी गाठणारी त्यांची अभिव्यक्ती…
चेहर्यावरचे हावभाव, अचूक मार्मिक भावगती…

सत्याची भलावण करणारी, अत्यंत प्रेरणादायी… 
अभिनयाची ताकद आकाशाला गवसणी घाली…

अनन्य-साधारण अष्टपैलू अभिनेता अशी कीर्ती  
त्या साजेशी मनाला भावणारी अभिनय-प्रस्तुती 
 
नाना प्रकारच्या उत्तम-भूमिका लीलया करूनही 
यश-प्रसिध्दीने नाना, हुरळून गेले नाहीत कधीही…
 
दुष्ट-चक्रम खल-नायकाच्या धीर-गंभीर, विनोदी…
भूमिकेत सहज शिरून, नाना करीत आपलीशी…

काव्य, नाटक, चित्रपट व्याप्ती सर्वच माध्यमांची…  
त्यांचा स्वत:चा स्वतंत्र-असा-ठसाच उमटवणारी…

नानांची माणूस म्हणूनही, असामान्य कामगिरी… 
भौतिक कुंपण लांघून, अलौकिक उंची गाठली…

समाज-सेवा, एक खडकर-व्रत समजूनच केली, 
सर्व-सामान्य माणसांच्या हक्कांची बाजू मांडली… 
 
नाना ही संवेदनशील-वृत्तीची, वैशिष्ट्यपूर्ण-व्यक्ती…
मातीशी नातं जपून, स्वाभिमानाने मान उंचावली… 

जिद्द, तथाकथीत मर्यादांवर आसूड ओढण्याची, 
अनावर ओढच होती प्रेक्षकांपर्यंत पोहोचण्याची… 

रसिकता इतकी त्यांच्या नसा-नसात भिनलेली, 
की मिट्ट काळोखही त्यांना वाटायचा, मखमली…

नानांनी त्यांच्या कलेतून प्रेक्षकांची मनं जिंकली… 
समाज-सेवा निस्वार्थीपणे करुन माणसं जोडली… 
 
नाना पाटेकर म्हणजे, सळसळता ज्वालामुखी…
जिवंत-अभिनयाने प्रत्येक भूमिकेमध्ये यशस्वी… 

🌷@तिलोत्तमा विजय लेले
🙏🕉️🔆