कविता : 🌷 प्रेरणादायी 
कवयित्री तिलोत्तमा विजय लेले

सर्वांसाठी हा दिवस सन्मानाचा-अभिमानाचा-आनंदाचा
डॉक्टर, इंजिनिअर, अंतराळवीरा होऊन गाजविण्याचा
सावित्रीबाई फुले-डॉ.आनंदी जोशी आदिंना स्मरण्याचा
त्यांच्या प्रेरणेने, स्वकर्तृत्वाने-जीवन सफल करण्याचा

युगे-युगे पुरुषांनी स्त्रीला कायम दुय्यम स्थानी मानले
वर-वरच्या मान-सन्मानाखाली , सर्रास अन्यायच केले
कुशाग्र बुद्धीच्या चाणक्यांनी, स्त्रियांचे सुप्त-गुण हेरले
स्त्री-प्रगती हीच समाज-प्रगती चाणक्य नीतीत कथिले

स्त्रीविना कुटूंब नाही, सुदृढ कुटूंबांशिवाय समाज नाही
संयम, धैर्य, जिज्ञासा-अखंड प्रेम, प्रेरणेचा स्त्रोत, स्त्री
सुशिक्षित-कर्तबगार-स्त्री कुटुंबाचं कल्याण करते नेहमी
भावी पिढ्या, समाज-उन्नतीसाठी ठाम उभी असते स्त्री

प्रत्येक स्त्रीने संधी मिळता, नेहमीच संधीचं सोनं केलं
स्व-क्षेत्रात अग्रेसर राहून कौटुंबिक-कर्तव्यही निभावलं
राणी लक्ष्मीबाईंनी मुल पोटाशी घेत रणांगण गाजवलं
मातेच्या प्रेरणेने शिवबानं मराठ्यांचं साम्राज्य उभारलं

स्त्रीस मातेसमान मानतो, तो जिजाऊंचा शिवबा असतो
योगबळाने पाठ तापवतो तो मुक्ताईंचा ज्ञानदेव असतो
सखीला जीवेभावे साथ देतो, तो राधेचा श्याम असतो
शिवधनुष्याची प्रत्यंचा ओढतो, तो सीतेचा राम असतो

यशस्वी व्यक्तीच्या पाठीशी किमान एक स्त्रीच असते
कठीण प्रसंगी निडरपणे सामोरी जाऊन ढालही होते
मायेने मोठं करते-व-मनोबल वाढवून ध्येयही बिंबवते
सुसंस्कार करून, स्वाभिमानाने जगण्याची प्रेरणा देते

@तिलोत्तमा विजय लेले
🙏🕉️🔆