कविता : 🌷 प्रत्येक-वाल्याचे रूपांतरण 
कवयित्री : तिलोत्तमा विजय लेले

मनुष्य-अवतारात श्रीरामास मानती आदर्शस्थानी...
रामा इतकेच"राम-नाम-जप-यज्ञ"आहे उच्चस्थानी...

नुसते राम-राम म्हटल्याने पापांचे डोंगर नष्ट होती...
ही थेट वाल्या कोळी पासूनच येते सर्वांना प्रचिती...

पाप जरी केलं मनाने, शरीराने, हातांनी, विचारांनी...
प्रत्येक घडलेलं पाप जमा होतंच जातसे अंतर्यामी...

वाल्या-कोळ्यानी केली पापं, कुटुंब-चरितार्थासाठी…
प्रेमापोटीच माणूस पापं करतो, पालन-पोषणासाठी...

पापांची वारूळंच्या-वारूळं तो उभी करतो मनांतरी
जेव्हा जागृक होतो, चिडतो-पस्तावतो, तो स्वतःवरी...

आयुष्यामध्ये जेव्हा-केव्हा त्याचे अंत:चक्षू उघडतात...
सपशेल उपरती होऊन, तेव्हाच होते नव्याने सुरवात...

अगदी सुरुवातीला, कसेही "राम राम" उच्चारायला...
मनं-बुद्धी अन् जीभ, तिन्ही तयारच नसते वळायला...

"राम-नाम"घेऊन वाल्याकोळीप्रमाणे नामजप केला...
शक्य होते सन्मार्गावर पहिलं-वहिलं पाऊल पडायला...

अर्थात कधीही "वाम-मार्ग" सोडणं, फार सोपं नसतंच...
अट्टाहासानं ठरवलं, "मरा-मरा"असं विपरीत म्हणायचं...

मग हळूहळू सुरु होत जातं पापांच्या राशींचं वितळंणं...
तळमळ पारखून, विधाताच करतो पुढील मार्ग-दर्शन...

चिकाटीने, अथक प्रयत्नांती, तारते "राम-नाम-स्मरण"...
अंतर्स्थित गुरुच करतो, "प्रत्येक-वाल्याचं" रूपांतरण...

🌷@तिलोत्तमा विजय लेले
🙏🕉️🔆