कविता : 🌷 " वाल्मिकी होऊ हेच ध्येय "
कवयित्री : तिलोत्तमा विजय लेले

आपण वाल्याकोळी असलो जरी,
वाल्मिकीच होणे आवश्यक आहे...
एरवी सत्याचे आकलन झाल्यावरही, 
परिस्थितीनुरुप बदलणे गरजेचे आहे.

गत-कर्मांचा पश्चात्ताप झाल्यावरही,
प्रायश्चित्त घेणेही अत्यावश्यक आहे...
ते संपूर्णतया सफल होण्यासाठीही,
घोर तपसाधनेची नितांत गरज आहे...

तपश्चर्या तनाची त्याचप्रमाणें मनाचीही,
भगवद्गीतेत कथिलेल्या, तटस्थपणाची...
भूतकाळातील घटनांचा परिणाम नाही,
भविष्यामध्ये डोकावण्याची इच्छा नाही...

"जे जे होईल ते ते पाहावे", निर्विकारे...
कोणाला दोषी न मानताच, स्वीकारावे...
'झाले गेले गंगेला मिळाले' असे मानावे,
तेव्हाच जमेल वाल्याचा, वाल्मिकी होणे...

काम-क्रोध-मोह-मत्सरादी षड्रिपूंवर मात
वेळीच न केल्यास निश्चितच होणार घात...
मनातील दानवांना पाठवूनी यमसदनास,
"महर्षी-वाल्मिकी होणे" हा एकमेव ध्यास...

जे जे येईल अंगावर, त्यांस घेऊनी शिंगावर,
सत्कर्मांची-अन्-सन्मार्गाची धरुनिया कास,
एकचित्त होऊनी नेटाने करू जीवन-प्रवास...
कुणी निंदा वा वंदा, हाच-आदर्श आहे खास...

जीवन-मरण आहे अटळ, नाही त्यांवर उपाय...
हातपाय गाळून न म्हणावे"हे माय, धरणी ठाय"
मिळालेल्या जीवनाचे-दान व्यर्थ न जाऊ देणे,
यासाठी धडपडत आकाश पाताळ एक करणे...

कुणाच्या जीवनी कधी होळी तर कधी दिवाळी...
कुणा दुर्दैवी जीवाच्या आयुष्याची राख-रांगोळी...
कुणा-कुणाच्या नशिबामध्ये असू शकेल झोळी...
तरीपण प्राणांची ही पर्वा न करता, एकच खेळी...

"वाल्मिकी होऊ हेच ध्येय-असू जरी वाल्याकोळी"...
"वाल्मिकी होऊ हेच ध्येय-असू जरी वाल्याकोळी"...

🌷@तिलोत्तमा विजय लेले
🙏🕉️🔆