कविता 🌷’ श्रावण सखा ‘
कवयित्री : तिलोत्तमा विजय लेले
तारिख : गुरुवार, १७ ऑगस्ट २०२३
वेळ : १२ वाजून २३ मि.
तो येतो अन् येते आनंददायी सुखद लहर
त्या संगे येतो अगणित पाना-फुलांना बहर
घुमतो, पशु-पक्षी-नद्यांचा मंजुळ नाद-स्वर
जाणीव होते, श्रावण सखा आल्या-नंतर
एका-हिरव्या-रंगाच्या किती छटा ढिगभर
तरी प्रत्येक रंग-छटा अत्यंत मोहक-सुंदर !
छटा-न्-छटा तना-मनास भुरळ घालणारी
क्षणार्धात डोळ्यांत भरणारी-सुखावणारी
सौंदर्याने जणू नजरेला खिळवून ठेवणारी !
स्वागतार्ह सख्याच्या वनवेलींचा बांधला झुला
हिरवा-कंच-मखमली जणू गालीचा अंथरलेला
नक्षी रंगी-बेरंगी फुलांची-वेल-बुट्टी-चितारलेला
पिवळ्या धम्म उन्हात न्हाऊन श्रावणात-सृष्टी,
भासते जणू ही हळद लागता नव-वधू-लाजरी
श्रावण-सख्याचे मंद स्मित-डुलती वृक्ष-वल्लरी
श्रावणात सजली ही अवघी सृष्टी नव-वधू-गत
नख-शिखांत साज-शृंगार, नटून-थटून सज्ज !
हिरवा शालू, हाती वरमाला-नाकात शोभे नथ !
हिरवागार निसर्ग-अंगोपांगी नव-चैतन्य फुलून
रिमझिम श्रावणसरी-वाजे हलकी-फुलकी धुन
हर्षानंदाला उधाण येऊन सणासुदीची धामधूम
🌷@तिलोत्तमा विजय लेले
🙏🕉️🔆
Leave a Reply