कविता - 🌷 ' मंतरलेली मैत्री '
कवयित्री - तिलोत्तमा विजय लेले 
तारिख - गुरुवार, ९ मे २०२४
वेळ - रात्री, ८ वाजून ३७ मि.

कधी दिसली शालेय गणवेशातील मुलं-मुली
आठवण होते, मंतरलेल्या शालेय जीवनाची

शाळा म्हणजे सहल-गॅदरिंग-बक्षिसं-मैत्रीणी 
खेळ-स्पर्धा-झिम्मा-फुगडी-संगीत-नाचगाणी

एक वर्षी वार्षिक स्नेहसंमेलन-आयोजन केलं 
त्यात संगीत-नाटकाचं सादरीकरण ठरलं होतं 

शाळेच्या गॅदरिंगचं नाटक होतं संगीत-शारदा 
नाटकात मी झाले वल्लरी आणि शशी-शारदा

मी आणि शशी म्हणजे जिवाभावाच्या मैत्रीणी 
भांडलो तरी फारवेळ दोघींना, करमायचं नाही 

नाट्य-गीतांच्या तालमीला, धमालच उडायची 
दर दिवशी तालीम, नवनवीन-व्यक्ति घ्यायची 

नऊवारी साडीचा भला मोठ्ठा बोंगा सांभाळत, 
जोडीला केसांचा दांडगा खोपा होता डोक्यावर 

पार जुन्या काळातील जड दागदागिने मिरवीत
नाटकात गायचंही होतं शास्त्रीय-नाट्य-संगीत 

त्यामुळे आम्हां दोघींना ती तारेवरची कसरत,
कशी जमवता आली हे त्या देवालाच माहित !

नाटक संपून टाळ्यांचा मोठा कडकडाट ऐकून 
आम्हां दोघींनाही बिल्कुल खरंच वाटलं नव्हतं 

म्हणून आम्ही एकमेकींना चक्क चिमटा काढून, 
पडताळून पाहिलं की हे सर्व खरं आहे की स्वप्न 

🌷@तिलोत्तमा विजय लेले
🙏🕉️🌅