कविता – 🌷 ‘ पालवी ‘
कवयित्री – तिलोत्तमा विजय लेले
तारीख – रविवार, २९ सप्टेंबर २०१९
अजून एक नवा करकरीत दिवस येतो …
नव्या आशांची कोवळी पालवी लेऊन !
पुन्हा तो आशाळभूत होऊन,
जणू मुजरा करीत तो लवून …
अपेक्षांचं असं ओझं लादून,
नव-बदलांची जाणीव होऊन …
तशात विचार जातो चाटून
अंगात काटा येतो सरसरून !
पाच गेले अन् पन्नास राहिले
म्हणता-म्हणता आली पन्नाशी …
पालटत गेली सगळी परिस्थिती …
तेंव्हाच बदलांची जाणीव झाली …
हे असं वारंवार का बरं घडतं,
याच विचाराने तनमन पोखरतं …
अपेक्षा बाळगून, निराश होऊन …
पदरी फक्त, नवीन अनुभव येतो !
तरुण सळसळतं रक्तं, नवा जोश
नवनवीन योजना+आनंदी जल्लोष
मग प्रश्नांची ही झुंड हवी कशाला ?
झुंज न देता, विषयाला बगल देऊन …
नवं-नवं सगळंच, हवं-हवंसं वाटतं …
जुनं-पानं मग पार निरूपयोगी ठरतं …
अनुभवाचे बोल, वाटू लागतात फोल …
सोईस्करपणे करती, ऐकलं-न ऐकलं …
अजून एक नवा करकरीत दिवस येतो …
सोनसळी संकेतासह हसत-खेळत येतो
नव्या आशांची कोवळी पालवी लेऊन !
नव्या आशांची कोवळी पालवी लेऊन !
🌷@तिलोत्तमा विजय लेले
🙏🕉️🔆
Leave a Reply