कविता - 🌷 ' ती '
कवयित्री - तिलोत्तमा विजय लेले 
तारिख - शुक्रवार, १९ एप्रिल २०२४
वेळ - संध्याकाळी, ५ वाजून ४४ मि.

ती हसली की वाटे नाजुकशी जाईजुई
कोमल इतकी, उन्हाने कोमेजून जाई

स्वच्छ गोरीपान नितळ वर्ण सोन-सळी
छोटसं तिचं नाक, वाटे जणू चाफेकळी 

मन-मोहक हास्य, दिसे जणू कुंदकळी 
दोन्ही गालांवर पडायची, मोहक खळी 

ती येता, आई मीठ-मोहऱ्या ओवाळी 
म्हणायची, दृष्ट न लागो वेळी-अवेळी 

तिचा लांब-सडक घन-दाट, केश-संभार 
काळ्या-सावळ्या घना-सम, काळा-शार

रूपानं इतकी देखणी की न ठरे नजर
गरज नसे तिला करायची कुंकू-पावडर 

जणू विधात्यानंच केलेली खास करामत
बघून तिला"दुखे पोट"अशी दयनीय गत

जणू महाराणी, दिसे साध्या धूत-वस्त्रात
एकदम उठूनच दिसे, ती हजारो जणात 

लाखात-एक-ती-म्हणजे माझी प्रिय ताई 
तिच्याशिवाय बालपण, पूर्ण होणार नाही 

🌷@तिलोत्तमा विजय लेले
🙏🕉️🌅