कविता - 🌷 " क्षण-क्षण मोलाचा "
कवयित्री - तिलोत्तमा विजय लेले 
तारिख - शनिवार, २० एप्रिल २०२४
वेळ - रात्री ८ वाजून ३७ मि.

कधी कधी असं होतं...
आतूनच पिसा-सारखं
खूप हलकं, रंगीत 
प्रफुल्लित वाटतं...

वेळ-काळाची बंधनं झुगारून 
मन त्या आनन्दसागरात 
यथेच्छ डुंबत राहतं...

काजवा जसा ज्योतीकडे...
तसं अंतरमन 
लख्ख प्रकाशाकडे 
झेपावतच राहातं...

परब्रह्माच्या त्या परमावधित...
मग सर्व काही विरघळून जातं ...
मी-तूपणाचा भाव, 
मोह-मायाचं जाळं 
सर्व भस्मसात होतं...

बाकी उरतं ते फक्त...
एक सुंदरसं नादब्रह्म...

स्वप्रकाश-रूपाचा...
तो आनन्द-सोहोळा 
अवर्णनियच असतो...
तेजोवलयांकीत असा 
तो प्रणव-स्वर 
मन रुपी हंसाला 
फारच मोहवतो...

देवाचिये द्वारी...
पाप-पुणण्याची गणना 
होईल तेव्हा होईल...
जोवर श्वास चालतोय तोवर, 
पुण्याचे सुवर्ण-कण वेचता येतील...

क्षण-क्षण मोलाचा 
जर तो सद्कारणी 
लावला जाईल...

🌷@तिलोत्तमा विजय लेले
🙏🕉️🔆