कविता -🌷 ‘ किमया चंद्रकोरीची ‘
कवयित्री – तिलोत्तमा विजय लेले
तारिख – गुरुवार २८ सप्टेंबर २०१७
नाजूकशी कोर चंद्राची आभाळी डोकावते,
मंद मंद प्रकाशाला, कवेत घेऊन खुणावते !
ती नाजुक-नवतरुणीच्या भाळी खास शोभते,
अन् तिच्या सौंदर्याला अधिकच मोहक बनविते
भाळीच्या त्या चंद्र-कोरीवर पडता एक नजर,
नव-युवकांच्या तना-मनाचा होतो धुंद भ्रमर !
कोणी रोज जीन्स-टीशर्ट मध्येच वावरणारी,
नऊवारी साडी नेसून नटून-थटून सणावारी,
निघाली चंद्र-कोर कोरून, मध्यमशा लयीत
शेंकडों पाहणार्यांच्या जणू हृदयांना चिरीत !
दोष कोणाचा, ना त्या मुलीचा वा युवकांचा
सर्व मामला आहे, त्या सुरेखशा चंद्र-कोरीचा !
भोळा कान्हा-खट्याळ चंद्र-खुणावे वेळीअवेळी
धुंद-वेड लावी जिवा-बावरी झाली राधा-भोळी
दोष नसे यमुनेचा, ना राधेचा-अथवा रजनीचा
सगळाच खेळ आहे हा, लबाडशा चंद्र-कोरीचा !
बागडत राही नभी, हळूवार छेडी चांदण्यांना
मिचकावून डोळे, पांघरूण घाली खोड्यांना !
सर्व प्रेमिकांचा लाडका, देखणा असा हा शशी
वाटतो नित्य-नवा, जरी दिसतसे दरेक-दिवशी !
ही किमया सारी प्रेमाची, कोणीच नाही दोषी
अनभिषिक्त राजे-महाराजे-नभीचे, रवी-शशी !
अनभिज्ञ भावना, अजाणतं वय, प्रीतिची नशा
मोहक-सुंदर या सगळ्याच, आयुष्याच्या दशा …
🌷@तिलोत्तमा विजय लेले
🙏🕉️🌅
Leave a Reply